ශ්රී ලංකා මලල ක්රීඩා ක්ෂේත්රයේ ඉදිරි ගමන්මග තීරණය කෙරෙන තීරණාත්මක නිලවරණය පසුගිය බ්රහස්පතින්දා (12) ක්රීඩා අමාත්යාංශයේ ඩන්කන් වයිට් ශ්රවණාගාරයේදී පැවැත්විණි.
එහිදී ශ්රී ලංකා මලල ක්රීඩා සංගමයේ නව සභාපතිවරයා ලෙස ප්රමුඛ පෙළේ ව්යාපාර පරිපාලකයකු මෙන්ම ආදි ආනන්දියෙකු වන බිමල් ප්රසන්න විජේසිංහ මහතා තේරී පත් විය.
සභාපති සටන සහ ජයග්රහණය
මෙම නිලවරණයේදී සභාපති ධුරය සඳහා ප්රබල තරගයක් පැවති අතර, බිමල් විජේසිංහ මහතා ඡන්ද 61ක් ලබා ගනිමින් විශිෂ්ට ජයග්රහණයක් වාර්තා කළේය.
ඔහු හමුවේ පරාජයට පත් වූයේ ජාත්යන්තර කීර්තියට පත් හිටපු මලල ක්රීඩකයෙකු මෙන්ම අත්දැකීම් බහුල පුහුණුකරුවෙකු වන සුනිල් ගුණවර්ධන මහතායි. සුනිල් ගුණවර්ධන මහතාට ලබාගත හැකි වූයේ ඡන්ද 38ක් පමණක් වන අතර විජේසිංහ මහතා වැඩි ඡන්ද 23කින් සභාපති ධුරයට තේරී පත් විය.
ලේකම් ධුරයේ වාර්තාගත ජයග්රහණය
මෙවර නිලවරණයේ වඩාත්ම කැපී පෙනෙන ජයග්රහණය වාර්තා වූයේ ලේකම් ධුරය සඳහා වූ තරගයෙනි. එහිදී මාධව සෙනරත් බණ්ඩාර මහතා ඡන්ද 64ක් ලබා ගනිමින්, ප්රතිවාදී අපේක්ෂක වෛද්ය ධම්මික සේනානායක මහතා (ඡන්ද 35) පරාජය කළේය.
මාධව සෙනරත් මහතා මෙවර නිලවරණයේදී වැඩිම ඡන්ද සංඛ්යාවක් මෙන්ම වැඩිම වැඩි ඡන්ද පරතරයක් සහිතව ජයග්රහණය කළ අපේක්ෂකයා ලෙස වාර්තා අතරට එක් විය.
පත්වූ නව නිලධාරී මණ්ඩලය
ශ්රී ලංකා මලල ක්රීඩා ක්ෂේත්රයේ උන්නතිය උදෙසා වගකීම් භාරගත් නව නිලධාරී මණ්ඩලය මෙසේය:
සභාපති: බිමල් ප්රසන්න විජේසිංහ මහතා
ලේකම්: මාධව සෙනරත් බණ්ඩාර මහතා
භාණ්ඩාගාරික: රසිකා නිලංගනී මහත්මිය
උප සභාපතිවරුන්: ජයන්ත සියමුදලි මහතා, ජගත් ඥානසිරි ද සිල්වා මහතා
උප ලේකම්: ඇලෝයි නිශාන්ත මහතා
උප භාණ්ඩාගාරික: ශාන්ත ද සිල්වා මහතා (නිතරගයෙන්)
විධායක කමිටු සාමාජිකයින් (08):
ප්රසන්න අලුයියාරේ මහතා, ගීතා පතිරවසම් මහත්මිය, ගීත උදයංග මහතා, ටෙනිසන් ශ්රී වර්ණසිංහ මහතා, ඊ. ඊශ්වරන් මහතා, නෙවිල් රුද්රිගු මහතා, වසන්ත පොන්සේකා මහතා සහ සුගත් කුමාර ගලගමගේ මහතා.
-සීවලී එදිරිවීර-
